I
аат.
1. Айаҥҥа эбэтэр таһаҕас тиэйэргэ мииниллэр сүөһү. ☉ Упряжной скот, рабочий скот
Дохуотун икки көлөнөн тиэйэн дьиэлээтэ. М. Доҕордуурап
Көлө көрдөһө куонньукка барда. С. Федотов
Көлөтө суох хайдах олороохтуой? Ким киниэхэ отун-маһын таһан биэриэй? И. Федосеев
2. көсп., кэпс. Бэйэтэ хаамар, айанныыр кыахтаах тиэхиникэ. ☉ Самоходная техника (на которой можно ездить)
Хатан ыстаал ыллык устун, Хаһыытыыхаһыытыы сындылыйан, Тэтимнээх тимир көлө Тилигирээн тиийэн кэлиэҕэ. С. Васильев
Сотору кыыс, модун хамбаайын Көлөтүн тигинэтэ, Көмүс долгуннаах уйгу-быйаҥ Муораны тэлэн истэ. И. Эртюков
◊ Көлө-илии звенота — окко, сириттэн көрөн, көлөнөн да, илиинэн да үлэлиир звено. ☉ Полумеханизированное звено (на сенокосе)
Ааспыт сайын …… уон аҕыс көлө-илии звенолара тэриллэн үлэлээтилэр. Ходуһа х. Көлө-илии звеноларыгар эмиэ ахсаабат кыһамньы ууруллара наада. «Кыым»
ср. др.-тюрк. көлүк ‘вьючное животное’
II
аат. Икки ачаах атахха ууруллар, уокка күөһү ыйыыр мас. ☉ Перекладина над костром для котла
Көлө мастарга хаардаах солуурдар кэккэлэстилэр. Амма Аччыгыйа
Чаанньыгын, көлө маска иилэн, уот төлөнүгэр уурда. В. Протодьяконов
Кутаа тула көлөлөргө ыйаммыт иһиттэр оргуйан бидилистилэр. Айталын
Оҕонньорум икки үтэһэҕэ сыалаах эти үөлэ охсон уотун кытыытыгар анньыталаата, уулаах солуурчаҕын көлө маска ыйаата. А. Кривошапкин (тылб.)