туохт., сөбүлээб.
1. Тугу эмэ оҥорорго, толорорго баҕа өттүттэн олус сыыдамсый, илин-кэлин түһүс (үксүгэр ньылаҥнаан эбэтэр ханнык эрэ бэйэ сыалын ситиһээри). ☉ Показывать большую расторопность, исполнительность (обычно в корыстных целях или из-за угодничества)
Абааһыга дылы аллааҕымсыйыма. Амма Аччыгыйа
«Евстегнеюшка олус аллааҕымсыйа сатыыр. Үлэһиккэ аһыыр да бокуойу биэрбэт», — диэтэ ким эрэ саҥата бараак хараҥа муннугуттан. Н. Якутскай
Зоя Аайа биир имнэниитинэн барытын тута өйдөөн, бэл аһара түһэ аллааҕымсыйан, хоһун Аайалаах Айааҥҥа туран биэрэн баран элэс гынан хаалбыта. Н. Габышев
2. Ханна эрэ талаһан сыыдамнык дьоруонан, сүүрүүнэн айаннаа, түргэтээ (үксүгэр дьиэ-уот сибикитин билбит айан атын туһунан). ☉ Прибавлять ходу, идти с большим желанием, торопиться, бежать рысцой (обычно о лошади, почуявшей приближение жилья)
Соломуон [ат] сордоох бу сырыыга тоҕо эрэ аллааҕымсыйан Талба диэки сиэлэн хаҥкычыктаабытынан барда. Амма Аччыгыйа
Өлүөскэ …… куруук умса дьулуруйан аллаҕымсыйбыт ат тэһиинин холкутатан биэрдэ. Эрилик Эристиин
Ээ, доҕор, эн арба даҕаны, ити көҕөччөрчөөнү миинэн кэлбит эбиккин дии. Арааһа, манна кэлэргэ кини аллааҕымсыйдаҕа? С. Никифоров. Тэҥн. аллааҕыр