сыһ. Илиигин туора быраҕан, быластаан. ☉ Крестообразно
Киһим сүүрэн иһэн эмискэччи эргиллээри, бүдүрүйэн, тоҥуу хаарга тиэрэ түстэ да, икки илиитин быластыы быраҕан сытта. Амма Аччыгыйа
Кэпсээнэ киирдэр эрэ, уһун илиилэрин быластыы, холбуу охсунан кэбиһэр, туох эрэ итиигэ олорбут курдук эгдэҥэлиир. А. Федоров. «Тохтуу түс эрэ...»— оҕонньор толкуйдаан олорбохтообута, тугу эрэ тутан ылыах курдук илиитин быластыы ууммута. И. Федосеев

туохт.
1. Илиилэргин туора уун. ☉ Растянуть руки в стороны
Хочо дуу, алаас дуу иннигэр эмискэччи нэлэс гына түстэхтэринэ, мэлдьи үөрүүлээхтик соһуйар буоларым. Илиибин быластаабытынан халдьаайыны таҥнары сүүрэр этим. Амма Аччыгыйа
Сонун көхөҕө ыйаан баран, саала дьыбааныгар кэлэн, илиитин быластаабытынан лах гына олордо. М. Попов
Мефодий кэнниттэн сүүрэн испит Остапенко эрэйдээх, хайдах эрэ дьиибэтик өрө эһиллэн баран, оҥхой быарыгар быластаабытынан оҕунна. ССС
2. Былаһынан кээмэйдээ. ☉ Измерять маховой саженью
[Дьаакып кинээс:] Өлөксөй, ити уол отун көрөн быластаабытыҥ дуо? Сыарҕата тахсыыһык дуо? А. Софронов
Торбос абааһыта. Чаччыстыбыт Чараас иэдэстээх, Ырдьайбыт Дьэбиннээх тиистээх, Ынайбыт дэдэгэр истээх …… Сииргэ-аһыырга тиэтэйбит Сэбэһэ быатын быластаата. С. Васильев
Өлүөскэ саамай улахан балыгы хаптарбыт: — Су-баччаны, — диэн баран, икки илиитин быластыыр. Н. Габышев
3. Киэҥ уһун сиринэн тайаа, тугу эмэ тилэри киэптээ. ☉ Распространяться, простираться на большом пространстве
[Борокуот] Ындыылаах баарсаны буксуурдаан Көс сири быластаан субуйда, Ыһыытыы-хаһыытыы чоргуутаан Биэрэккэ эрдээхтик дьулуйда... С. Васильев
Хайаҕа Мантан ыраах, оол, үөһэ, мамонт кыыл аһыытыныы Кырыыланан, эбии үрдээн, Кыйыр арҕас быластыыр. Р. Баҕатаайыскай
4. Туора сараадый (хол., көтөр кынатын, мас мутугун тустарынан). ☉ Раскидываться, растопыриваться (о ветвях дерева, крыльях крупных птиц)
Хаххан буоллаҕына, ойоҕун кытта бырастыылаһан-бырастыылаһан баран, кынатын быластыаҕынан быластаан, хоту диэки көтөн сабырыйа турбут. Суорун Омоллоон
Дьорҕоот, ити туох көтөрө биһиги үрдүбүтүгэр кэлэн быластаан хаалла? Н. Заболоцкай
Сиэл ыйыыр дэлбиргэ баайар Сэттэ урдаах кырдьаҕас тиит Суон, хаппыт мутуктарынан Суолу туора быластаан турда. С. Васильев