аат. Оҕолорго, ыччаттарга сүбэ-ама биэрээччи, уопуттаах иитээччи. ☉ Наставник
Онус кылааһы бүтэрбит оҕолору үлэҕэ такайыыларын тустарынан настаабынньыктар Уйбаанчык уонна Дьаана бэрт сонурҕатыылаахтык сэһэргээтилэр, үөрэнээччилэри үлэлии кэлэргэ ыҥырдылар. В. Протодьяконов
Владимир Михайлович, аныгылыы эттэххэ, эдэр суруйааччылар дьиҥнээх настаабынньыктара буолар. СГС ӨСҮДь

аат. Кими эмэ туохха эмэ үөрэтэр киһи, уһуйааччы. ☉ Тот, кто учит кого-л., учитель, наставник, воспитатель
П.А. Ойуунускай саха литературнай ыччатын дьиҥнээх үөрэтээччитэ этэ. ТГС ЫА
Үөрэммэккэ сылдьан онон дьэ Үөрэтээччи буола охсон хаалтым. С. Данилов
Оҕолору толкуйдата, туохха барытыгар бэйэлэрин өйдөрүнэн тиийэллэрин сатаан ситиһэр киһи, дьэ, ол кырдьык дьиҥнээх үөрэтээччи. «ХС»

аат.
1. Сүбэ биэрэр, ыйар-кэрдэр киһи. ☉ Советчик, наставник
«Арба, сүбэһиттэрдээх этим буолбат дуо?» — диэн санаа киниэхэ киирэн, сирэйэ соҕотохто сырдаан, хараҕын уутун соттон, олоро түспүтэ. Суорун Омоллоон
«Бэйэтиттэн ыйытыахха наада», — Устин сүбэһит буолла, сыҥаах баттанна. Н. Габышев. Аргыһым — кырдьаҕас табаһыт, сээркээн сэһэнньит, эдэрдэргэ үтүө сүбэһит, мындыр өйдөөх Нэгиэччээн оҕонньор. Доҕордоһуу т.
2. Тэрилтэҕэ анал дуоһунас, маннык дуоһунастаах үлэһит. ☉ Советник (должность и человек, занимающий её)
Кинилэр баай ыччаттара ньалҕарыйа лаһарыйбыт таайдара-абаҕалара сэбиэскэй сууттарга «сүбэһиттэр», «үөрэхтээх идэлээхтэр» сололоругар күөтээн олороллор. Амма Аччыгыйа
Судаарыстыба бэйэтэ сүбэһиттэрдээх, үрдүкү чиновниктардаах итиэннэ тас дойдулары кытта сибээстэһэр дьонноох буолар. «Сахаада»
△ Сорох тэрилтэҕэ эдэр үлэһиттэри үөрэтэр-такайар анал үлэһит. ☉ Наставник (должность)
«Байбал оҕо сөпкө этэр», — кэлин кэмҥэ пиэрмэ эдэр кыргыттарыгар сүбэһитинэн үлэлиир Кэтириис эмээхсин сымнаҕас-сымнаҕастык саҥаран унаарытта. Софр. Данилов

аат.
1. Оҕолору көрөрхарайар, үөрэтэр киһи. ☉ Воспитатель
[Аҕата уолугар:] Мэниктээмэ, учууталларыҥ, иитээччилэриҥ тылын истэр, сыаналыыр буол! - сыллаан ылар. И. Данилов
Иитээччилэрбит биһиэхэ олус кыһаналлар. «ББ»
Илларион Леонтьевич Бүлүү куоратынааҕы детдомҥа, сэрии иннинэ саҕалаан испит үлэтин салҕаан, иитээччинэн үлэлээбитэ. «ХС»
2. Үөрэтэн, салайан, ыйан-кэрдэн биэрэр киһи. ☉ Наставник
Саха норуотун умнуллубат ньургун уола, бастыҥ талааннаах ырыаһыта, саха суруйааччыларын тапталлаах убайдара уонна иитээччилэрэ Платон Алексеевич Ойуунускай үтүөкэннээх киһи этэ. Амма Аччыгыйа

1. даҕ. Атыттартан дуоһунаһынан аҕа, үрдүкү турар. ☉ Стоящий выше других по должности, старший
   Дементьев салайар поисковай партиятыгар ыстаарсай тиэхиньик-геологынан үлэлии барыста. И. Федосеев
   Николай Петрович, дуоһунаскынан да ыстаарсай буоларыҥ быһыытынан, эдэр испэсэлиискэ мындыр дьоҕуру иҥэрэргэ кыһалын. П. Аввакумов
   Ыстаныыга кылаабынай судьуйаҕа көмөлөһөргө биир эбэтэр икки ыстаарсай судьуйа ананар. СНККБ
2. аат. суолт. Дьону салайан үлэлэтэр киһи, биригэдьиир. ☉ Наставник в работе, бригадир
   Дараҕар санныларынан холуоданы таарыйа сыһа-сыһа, мас суулларааччылар бөлөхтөрүн ыстаарсайа киирэн кэллэ. БХ Иэ
   Ыччат сүөһүнү көрөр-харайар биэс-алта оробуочай ахсын биир ыстаарсай ананар. СҮТТ