күөдьүт диэнтэн х-ччы аата
Партийнай үлэһит, дьиҥэ, дьон дууһатыгар баар сырдык уоту күөдьүтээччи, күүһүрдээччи. Амма Аччыгыйа. Кини сэриини күөдьүтээччилэр сидьиҥ сигилилэрин саралыы тардан эттэ. А. Федоров

туохт.
1. Мас эбэн эбэтэр сөргүтэн, уоту күүһүрдэн биэр. ☉ Разжигать, раздувать (огонь)
Өлөөнө оҕотун оронугар илдьэн олордон баран, оһоҕун күөдьүтэр, чаанньыктаах чэйи сылыта туруорар. Н. Якутскай
Ньырбачаан ойон туран, арыычча кылайан сытар чохторго эрдэттэн бэлэмнээбит амынньыарын тоһуталаан быраҕаттаабыта, кутаатын күөдьүппүтэ. Далан
Көкөт Сэмэн, тимир ууһун курдук оһох чанчыгар олорон, уот өһөн бардаҕын аайы күөдьүтэн истэ. Эрилик Эристиин
2. көсп. Күүһүрдэн, сэтэрдэн биэр; хаттаан саҕаланарын ситис. ☉ Разжигать, усиливать; добиваться возобновления чего-л., пробуждать
Ол эрээри бу сырыыга [Миша] тулуйбата, Айаан эрийэнмоһуйан эппит тыллара киниэхэ тугу эрэ күөдьүтэллэр. Н. Лугинов
Саҥа дьыл эйиэхэ уонна киниэхэ саҥа эрэли үөскэтэр, эһиги умуллубут уоттаах тапталгытын күөдьүтэр. Т. Сметанин
Эдэр ыччат ортотугар революционнай санаа кыымын өрүүтүн политическай сыылынайдар күөдьүтэллэрэ. «ХС»

побуд. от күөдьүй = 1) разжигать, раздувать (огонь); оһоҕу күөдьүт = разжечь огонь; 2) перен. разжигать, усиливать; возобновлять; иирээни күөдьүт = разжечь ссору.